Xaaladda Bariga Dhexe oo Cirka Isku Shareertay Kadib Duqaymo Culus oo u Dhexeeya Israa’iil iyo Lubnaan Xaaladda amni ee gobolka Bariga Dhexe ayaa mar kale gashay marxalad adag, kaddib markii ay dib u soo cusboonaadeen duqaymo culus oo u dhexeeya Israa’iil iyo Lubnaan.
Xiisadda sii kordheysa ayaa timid kadib markii Israa’iil ay qaaday weerarro dhinaca cirka ah oo lagu beegsaday goobo ku yaalla gudaha Lubnaan, taas oo keentay in colaaddii muddooyinkii dambe yara degganeyd ay dib u qaraxdo.Wararka ka imanaya gobolka ayaa sheegaya in duqaymaha ay sababeen burbur hantiyeed iyo cabsi baahsan oo soo wajahday shacabka ku nool deegaannada xuduudda ku teedsan. Dhinaca kale,
kooxaha hubeysan ee ka howl gala Koonfurta Lubnaan ayaa la sheegay inay jawaab ka bixiyeen weerarradaasi, iyagoo gantaallo iyo madaafiic ku tuuray dhulka Israa’iil.Beesha caalamka ayaa muujisay walaac xooggan oo ku aaddan colaaddan dib u soo laba kacleysay,
iyadoo Qaramada Midoobay iyo dalal badan ay ugu baaqeen labada dhinac inay joojiyaan dagaalka isla markaana ay ka fogaadaan tallaabooyin horseedi kara dagaal ballaaran oo gobolka oo dhan saameeya.Khubarada arrimaha gobolka ayaa aaminsan in haddii aan xal degdeg ah loo helin xiisaddan, ay halis ku noqon karto xasilloonida guud ee Bariga Dhexe,
maadaama ay colaaddani ku soo beegantay xilli ay horey u jireen khilaafyo iyo dagaallo ka socda qaybo kale oo gobolka ah. Dadka rayidka ah ayaa ah kuwa ugu nugul saameynta colaaddan, iyadoo laga cabsi qabo inay sii kordhaan khasaaraha bani’aadamnimo haddii duqaymaha iyo iska horimaadyadu sii socdaan.
