Shiinaha oo dadaal xooggan ku bixinaya xalinta xiisadda Iran iyo Mareykanka
Dowladda China ayaa kordhisay dadaallada diblomaasiyadeed ee lagu doonayo in lagu dejiyo xiisadda sii kordheysa ee u dhexeysa Iran iyo United States, kadib dagaallo iyo khilaafyo ka taagan marin-biyoodka muhiimka ah ee Hormuz.
Wasiirka Arrimaha Dibadda ee Shiinaha Wang Yi ayaa la sheegay inuu wadahadallo la yeeshay madaxda Pakistan iyo dalal kale oo gobolka ah si loo xoojiyo wadaxaajoodyada nabadeed. Wararka ayaa sheegaya in Beijing ay ku boorrisay Pakistan inay sii waddo dhex-dhexaadinta u dhexeysa Tehran iyo Washington.
Shiinaha ayaa si weyn uga walaacsan saameynta dagaalka uu ku yeelan karo dhaqaalaha caalamka, gaar ahaan shidaalka iyo ganacsiga mara marinka Hormuz oo kamid ah meelaha ugu muhiimsan ee maraakiibta shidaalka adduunka. Dowladda Beijing ayaa ku baaqday in la ilaaliyo xorriyadda isu socodka maraakiibta iyo in colaadda lagu dhammeeyo wadahadal.
Sidoo kale warbixinno caalami ah ayaa sheegaya in Shiinaha door muhiim ah ku lahaa qancinta Iran si loo aqbalo xabbad-joojin ku meel gaar ah oo ay dhexdhexaadinaysay Pakistan, inkastoo wali ay jiraan khilaafyo waaweyn oo ku saabsan cunaqabateynta, uranium-ka Iran iyo maamulka marinka Hormuz.
Khubarada siyaasadda ayaa aaminsan in Shiinaha uu doonayo inuu isu muujiyo quwad diblomaasiyadeed oo caalami ah, isla markaana uu ka hortago qalalaase dhaqaale oo saameeya danihiisa ganacsi iyo shidaalka uu kasoo dejisto Bariga Dhexe.
