Sacdiya Yaasiin Xaaji Oo Noqotay Haweenaydii Ugu Horreysay Ee Qabata Guddoomiyaha Golaha Shacabka Soomaaliya Muqdisho – Marwo Sacdiya Yaasiin Xaaji ayaa gashay taariikh cusub, kaddib markii ay noqotay haweenaydii ugu horreysay ee si ku-meel-gaar ah u qabata xilka Guddoomiyaha Golaha Shacabka ee Baarlamaanka Federaalka Soomaaliya.
Sacdiya Yaasiin ayaa xilkan la wareegtay kaddib markii Guddoomiyihii Golaha Shacabka, Sheekh Aadan Maxamed Nuur (Aadan Madoobe), loo doortay Madaxweynaha Dowlad Goboleedka Koonfur Galbeed Soomaaliya. Isbeddelkan ayaa horseeday in Sacdiya, oo ahayd Guddoomiye Ku-xigeenka Koowaad ee Golaha Shacabka, ay si rasmi ah u gudato waajibaadka guddoomiyenimada Golaha.
Tallaabadan ayaa loo arkaa mid taariikhi ah, maadaama ay tahay markii ugu horreysay ee haweeney Soomaaliyeed ay gaarto heerkan sare ee hoggaaminta Golaha Shacabka tan iyo markii la aas-aasay dowladnimada casriga ah ee Soomaaliya.
Siyaasiyiin, xildhibaanno iyo qaybaha kala duwan ee bulshada ayaa hambalyo u diray Marwo Sacdiya Yaasiin Xaaji, iyagoo ku ammaanay doorkeeda hoggaamineed iyo waayo-aragnimada ay u leedahay howlaha baarlamaanka. Waxa ay sidoo kale ku tilmaameen dhacdadan mid dhiirrigelin u ah ka qaybgalka haweenka ee siyaasadda iyo hoggaanka dalka.
Sacdiya Yaasiin Xaaji ayaa hore uga mid ahayd haweenka ugu firfircoon Baarlamaanka Federaalka Soomaaliya, iyadoo door muuqda ka qaadatay doodaha sharci dejinta, horumarinta dowladnimada iyo kor u qaadista matalaadda haweenka.
Magacaabistan ayaa loo arkaa guul muhiim ah oo u soo hoyatay haweenka Soomaaliyeed, isla markaana muujinaysa in haweenku ay gaari karaan xilalka ugu sarreeya ee hoggaanka hay’adaha dowladda.
