Khilaaf Siyaasadeed oo Ka Dhex Qarxay Hoggaanka Hirshabeelle Warar laga helayo Dowlad-goboleedka Hirshabeelle ayaa sheegaya inuu cirka isku shareeray khilaaf siyaasadeed oo u dhexeeya Madaxweynaha Hirshabeelle, Ali Guudlaawe iyo Madaxweyne Ku-xigeenka Hirshabeelle, Yuusuf Axmed Hagar Dabageed
Khilaafkan ayaa la sheegay inuu saameyn ku yeeshay howlaha maamulka, iyadoo inta badan xildhibaannada iyo wasiirrada kasoo jeeda gobolka Hiiraan ee ka tirsan Hirshabeelle ay ka baaqsadeen safar ay ku tagi lahaayeen magaalada Jowhar. Mas’uuliyiintan ayaa reportedly diiday inay raacaan diyaaraddii u qaadi lahayd Jowhar, halkaas oo uu ku wajahan yahay Madaxweynaha Soomaaliya, Hassan Sheikh Mohamud, si uu xarigga uga jaro mashaariic horumarineed oo laga hirgeliyey magaalada.
Ilo xog-ogaal ah ayaa tilmaamaya in khilaafka u dhexeeya Ali Guudlaawe iyo Dabageed uu soo jiitamayay toddobaadyadii lasoo dhaafay, inkastoo aan si rasmi ah loo shaacin waxyaabaha salka ku haya. Khilaafka ayaa hadda u muuqda mid si cad bannaanka ugu soo baxay, kaddib markii ay muuqdeen calaamado muujinaya kala qaybsanaan siyaasadeed oo ka dhex jirta maamulka Hirshabeelle.
Ilaa hadda ma jiro war rasmi ah oo kasoo baxay labada mas’uul oo faahfaahinaya sababaha keenay khilaafka, hase yeeshee arrintan ayaa walaac ka dhalisay siyaasiyiinta iyo shacabka deegaannada Hirshabeelle, maadaama ay saameyn ku yeelan karto wada shaqeynta maamulka iyo arrimaha horumarinta ee gobolka. Waxaa la filayaa in maalmaha soo socda ay soo baxaan faahfaahin dheeraad ah oo ku saabsan halka uu salka ku hayo khilaafkan iyo sida loo xallin karo.
